УИХ-ын гишүүн Ц.Даваасүрэн чуулганы хуралдаанд нэлээд ноцтой асуудал хөндлөө. Тэрбээр, “2014 оны арваннэгдүгээр сарын 4-нд ирсэн албан тоотыг би та бүхэнд уншиж сонсгоё.

Монгол Улсын 2015 оны Төсвийн тухай хуулийн дагуу УИХ-ын гишүүн Ч.Хүрэлбаатарын хүсэлтээр улсын өрийн нэгдсэн мэдээллийг Төсвийн байнгын хороонд хүргүүллээ гэсэн Сангийн яамны албан тоот ирсэн.

Тэнд Засгийн газрын өр 2.5 их наяд, Дотоодын Засгийн газрын өр 1.2 их наяд, гадаад баталгаа 2.2 их наяд, компаниудын өр 888 тэрбум гэх мэтээр нийлээд 9.9 их наяд төгрөг байна гэж ирүүлсэн. УИХ-ын гишүүдээс асуусан асуултад ийм хариулт өгсөн.

Гэтэл Сангийн сайд одоо 14 их наяд төгрөг гэж яриад байх юм. Тэнд таван их наядын асуудал яригдаж байна. Түүнийгээ ам.доллараар шилжүүлэхээр 2.7 тэрбум ам.доллар гараад ирлээ. Юу болж байна вэ. Энэ их мөнгө хаанаас гараад ирэв. Худлаа ярьж байсан, УИХ-ын гишүүдийн хүсэлтэд худлаа мэдээлэл ирүүлсэн бол хариуцлага ярих ёстой биз дээ. Нууж хаасан юм биш үү гэв.

Харин Сангийн сайд Ж.Эрдэнэбат “2014 оны есдүгээр сарын 30-ны байдлаар гаргасан тоог та нарт өгсөн гэж байна. Тухайн үед улсын өр ДНБ-ий 49.4 хувь байсан юм байна. Харин миний барьж байгаа нь 2015 оны эхний улирлын байдлаар гаргасан баримт.

Энийг та бүхэнд хүргүүлье” гэв. Харин УИХ-ын гишүүн Ц.Даваасүрэн нэг сарын өмнө өгсөн баримт. Он дамжих хугацаанд та бүхэн 2.7 тэрбум ам.доллар хаанаас олов. Энэ асуудлыг шалгаж байж цаашаа явна шүү. Та нар нэмээд мөнгө авсан юм биш үү. Ноцтой асуудал байна хэмээлээ.