Испаниас Германы Дюссельдорф хот руу зорчиж явсан “German- wings” компанийн “Эйрбас А320 загварын нисэх онгоц мягмар гаригийн өглөө Францын нутаг Альпийн нуруунд осолджээ. Онгоцонд зорчигч, нисэх багийн гишүүн нийлсэн нийт 150 хүн явж байжээ. Үүнд Испанийн 45, Казахстаны дөрөв, Германы 67 иргэн зорчиж явснаас 16 сурагч, хоёр нялх хүүхэд байсан аж. Үүнээс гадна онгоцонд явсан Англи, Нидерланд, Австрали, Аргентин, Колумб, Япон, Мексикийн иргэд амь насаа алдсан байна. Онгоц Альпийн нуруун дахь Францын Дээд Прованс мужид осолдохдоо тогтсон чиглэлээсээ хазайсан байсан гэнэ. Чиглэлээсээ хазайсны шалтгаан тодорхойгүй боловч ослын өмнөхөн өндрөө бууруулж, хурдаа сааруулсан байна. Шинжээчид үүнийг онгоцны битүүмжлэл алдагдсан эсэхийг нисгэгчид ойр орших нисэх буудалд буухыг оролдсонтой холбон тайлбарласан боловч багийн гишүүд ослын дохио илгээгээгүйгээс гадна цаг агаарын улмаас баримжаа алдсан байх үндэслэл бага аж.

Ослын газарт эхний өдөр нийт 12 том хэсэг илрүүлсэн боловч 10 га талбайд тархсан эдгээр хэсгийн хэмжээ нэг метрээс хэтрэхгүй жижигхэн байсныг орон нутгийн цагдаагийнхан өгүүлжээ. Энэ бүгдээс үзэхэд онгоц агаарт дэлбэрээгүй харин уулын энгэрийг өндөр хурдтай явахдаа мөргөсөн гэдгийг илтгэж буйг шинжээчид өгүүлсэн байна. Ослын газарт цагдаа, цэргийнхэн нийлсэн 600 гаруй хүн, 10 нисдэг тэрэгтэй эрэл хайгуул хийж байгаа юм. Гэвч осол гарсан газарт шууд очих зам харгуй байхгүйгээс эрлийнхэн 3000 гаруй метрийн өндөрт нэг бол хэдэн цаг алхах, эсвэл уулын огцом энгэрт нисдэг тэргээр очиж, олсоор буух сонголттой тулгарч байгаа аж. “Flight Radar” сайтад мэдээлснээр энэхүү 0147 дугаартай онгоц нь 1990 оны арваннэгдээр сард үйлдвэрлэсэн “А320” загварын хамгийн хуучин хөлгүүдийн нэг юм байна. Онгоц 1991 оны хоёрдугаар сард “Lufthansa”, 2003 онд “Germanwings”-ийн мэдэлд иржээ. “German- wings” нь “Lufthansa”-ийн охин компани ба хямд үнээр үйлчилдэг. Нэг жилийн дараа онгоцыг дахин “Lufthansa”-д шилжүүлсэн боловч 2013 онд “Germanwings”-д эргэн иржээ. Аврагчид ослын газраас онгоцны хар хайрцагны нэгийг илрүүлсэн байна.
 
 “Germanwings” болон түүний толгой компанийн нисгэгчид “Эйрбас А320” онгоцоор нисэхээс татгалзаж буйг “Шпигель” сонины онлайн хувилбарт мэдээлжээ. Нийт 150 хүн амь насаа алдсан ослын шалтгаан тодорхой биш. Эрх баригчид алан хядах ажиллагаа болсон, техникийн бүрэн бус байдал зэрэг хувилбарыг бодитой биш гэж үзсэн аж. “Germanwings” компаниас мэдээлснээр онгоцыг 10 жилийн туршлагатай, Эйрбас онгоцоор нийт 6000 гаруй ниссэн нисгэгч жолоодож явжээ. Үүнээс гадна агаарын хөлгийг 2013 оны зун иж бүрэн шалгаж, осол болохоос нэг өдрийн өмнө онгоцыг нислэгийн өмнөх үзлэгт оруулсан аж. Гэхдээ хэвлэлүүдэд мэдээлснээс үзэхэд үзлэгийн үеэр онгоцонд техникийн гэмтэл илэрчээ. Дюссельдорф, Штутгартын нисэх буудлуудад Германы авиа компанийн зарим багийнхан “Эйрбас А320” “Хувийн шалтгаанаар” хэмээн тайлбарлаж, онгоцоор нисэхээс татгалсан байна. Үүнээс болж, осолдсон онгоцны буух ёстой байсан Дюссельдорфын нисэх буудалд хуваарьт олон нислэг мягмар гаригт цуцлагдсаныг зорчигчид өгүүлжээ.