Таван толгойн нүүрсний нөөцийг Монголчууд бараг “барж идэхээргүй” их гэдэг. Энд хоёр тэрбум тонн коксжих нүүрсний нөөц бий. Энэхүү ордын хөрөнгө оруулалтыг шийдэж, эдийн засгийн үр ашигтай эргэлтэнд оруулах гэж манай төр засгийнхан сүүлийн жилүүдэд нэлээд “будилсан”. Сү.Батболдын Засгийн газрын үед гадаадын зарим  хөрөнгө оруулагчдаа “гомдооход” ч хүрч байлаа. Тэгвэл өнөөдрөөс  энэ асуудал хэлэлцээний  шатандаа тулж очлоо.  

Сонгон шалгаруулалтаар Японы Сумитомо, Хятадын Шинхуа энержи, Монголын Энержи ресурс компаниуд тодорсон. Монгол улсын сайд М.Энхсайханаар ахлуулсан  ажлын хэсгийнхэн  хөрөнгө оруулах, хамтран ажиллах хэлэлцээг  цагаан сараас өмнө амжиж нэг мөр болгох зорилго тавьж буй аж. Гэхдээ энэ хугацаанд багтах эсэхийг одоогоор таахад бэрх. Таван толгойн ордын лиценз төрийн мэдэлд хэвээр үлдэнэ. Гагцхүү менежментийг нь эдгээр компаниуд хариуцах болж байна. Төмөр замын болон бусад дэд бүтцийн асуудлууд хэрхэн шийдэгдэх  нь хэлэлцээний үр дүнгээс хамаарах юм. Консорциум болж орж ирж буй компаниуд дэлхийд тэргүүлэх хэмжээний гэдгээрээ онцлог бөгөөд Японы Сумитомо гэхэд л 1919 оноос үйл ажиллагаагаа тасралтгүй явуулж байгаа, технологийн хувьд  шилэгдмэл компани юм байна. Хятадын Шинхуа энержи  мөн ялгаагүй, тус улсын төрийн мэдэлд байдаг, олон улсын түвшинд ажиллаж дадлагажсан компани ажээ. Монголын Энержи ресурс сүүлийн жилүүдэд Таван толгойд цахилгаан станц, хотхон зэргийг барихад ихээхэн хөрөнгө оруулсан, гадаад зах зээлээс  нэлээд хөрөнгө босгож ажиллажээ.  Эдгээр компаниуд Таван толгойд 4 тэрбум ам.долларын хөрөнгө оруулахаар ярилцаж байна.

Б.Баяр

Эх сурвалж: Tumen.mn