Жижиг дунд үйлдвэрлэл эрхлэгчид чуулж, жаргал зовлонгоо хуваалцлаа. Тэдний төлөөлөл болох 700 гаруй хүн амжилт ололтоо тоочихоос илүүтэйгээр өнөөгийн төр засгаас амар тайван ажиллаж, бүтээгдэхүүнээ дотоод, гадаадад чөлөөтэй борлуулах эрх зүйн орчинг шаардав. Өнөөдөр Монголд идэвхтэй үйл ажиллагаа явуулж буй аж ахуйн  нэгжүүдийн 85 орчим хувь нь буюу 50 600 орчим нь жижиг дунд үйлдвэр эрхэлж байгаа ажээ. Энэ нь монгочлуудын гол тулах хүч гэсэн үг. Иймээс  эдгээр хүмүүсийг дэмжих нь төр засгийн ч, жирийн  иргэний ч онцгой үүрэг гэдгийг энэ үеэр үг хэлсэн хүмүүс тодотгож байлаа. Үйлдвэрлэл эрхлэгчдийг бичил, жижиг, дунд, том хэмээн ялгаатай авч үзэх нь буруу гэдгийг ч хэлсэн юм. Учир нь тэд бүгд ижил хувиар татвар төлдөг тул том багаар ялгах утгагүй аж. Ер нь дотоодын нийт бүтээгдэхүүний 20 гаруй хувийг бүтээдэг эдгээр аж ахуйн нэгжүүд экспортын  0.7 хувийг гаргаж байна. Мөн хүн амынхаа 70 орчим хувийг ажлын байраар хангадаг болжээ. Тэгэхээр хамгийн чухал салбар болж байна. Тиймээс тэднийхээ  бүтээгдэхүүнийг монголчууд  дарга, цэрэг гэлтгүй бүгдээрээ  нэгэн жигд худалдан авдаг байвал  хамгийн том дэмжлэг болох ажээ. Үүнийг  тэд  иргэддээ уриаллаа.

Б.Баяр 

Эх сурвалж: Tumen.mn