“Ухаалаг Улаанбаатар” хөтөлбөрийн хүрээнд нийслэлийн Мэдээллийн технологийн газраас “Улаанбаатар хотыг утасгүй
интернетжүүлэх” төслийг хэрэгжүүлж эхэлжээ.
Мэдээлэл Технологийн Газар Нийслэлийн 9 дүүргийн 151 хорооны нийт 155 байршилд утасгүй интернетийн бүс байгуулж, иргэдийг үнэ төлбөргүй интернетийн сүлжээгээр хангахаар ажиллаж байна. Эхний ээлжинд Хан-Уул, Сонгинохайрхан, Сүхбаатар, Баянзүрх дүүргийн зарим хороонд утасгүй интернетийн бүсийг туршилтаар бий болгоод байгаа ч энэ сардаа багтаан дээрх 155 цэгийг бүрэн хамруулахаар төлөвлөжээ.
Хотын үнэгүй, утасгүй интернетэд холбогдохын тулд иргэд өөрт ойр байрлах хорооны байр орчимд Wifi дэмждэг төхөөрөмжөө ашиглан “UBWiFi” нэртэй сүлжээнд холбогдон бүртгүүлэх хэрэгтэй. Хэрэв өмнө нь цахим газар өмчлөл, цахим зуслангийн газар өмчлөлд бүртгүүлэн хандаж байсан бол тухайн бүртгэлийн мэдээллийг ашиглан утасгүй интернетэд нэвтрэн орж болно. Энэхүү сүлжээнд холбогдсоноор иргэд www.ulaanbaatar.mn, www.citizen.ulaanbaatar.mn,www.land.ulaanbaatar.mn, www.manaikhoroo.mn,
www.eabi.ub.gov.mn, www.data.ulaanbaatar.mn, www.smartcar.mn зэрэг төрийн үйлчилгээний цахим сайтуудад өндөр хурдтайгаар холбогдож төрийн үйлчилгээг түргэн шуурхай авах, мэдээ мэдээллээр хангагдах, өөрийн санал хүсэлт, өргөдөл гомдлоо нийслэлийн удирдлагад шууд илгээхээс гадна интернетийн орчинд хүссэнээрээ аялах боломжтой болох юм.
