нийтлэсэн Admin

Шинэ Үндсэн хууль батлагдсан өдөрт зориулсан барилдааныг зурагтаар үзсээн. Улсын заан Д.Рагчаа, Д.Баасандорж нараар манлайлуулсан 224 бөх барилдсан. Миний хувьд нөгөө аварга, арслангууд нь эзгүй л байж дээ гэж бодож байв. Гэтэл бөх сонирхогчид нэлээд шүүмжлэлтэй хандсныг сүүлд нь уншиж, сонсов доо. Юу гэж шүүмжилсэн бэ гэвэл бөхчүүд шагнал их, багийг харж барилддаг болоод төрт ёсны энэ хүндэтгэлийн барилдаанд ирсэнгүй гэж.

Энэ туйлын үнэн байсныг саяын харцага цолтонд хүндэтгэл үзүүлэх тэр барилдааныг “Жем интернэшнл” группийн 15 жилийн ойд зориулсан болохоор шагналын сан өндөр юм байж. Түрүүлсэн бөх таван сая, үзүүрлэсэн бөх 2.5 сая, дөрөвт үлдсэн хоёр бөх тус бүр хоёр сая төгрөгийн шагналтайг мэдэж л дээ. Тэгээд л одоо барилдаж байгаа аварга, арслан, заанууд бүгд иржээ.

Үгүйлэм бөх Ч.Санжаадамба л байх шиг санагдсан. Нэг нөхөр хошигнохдоо “Тэр чинь саяхан Өвөрмонголд болсон барилдаанд түрүүлж бөөн алт авч ирсэн болоод таван сая төгрөг тоосонгүй” гэж байлаа. Ортой ч байж мэднэ. Тэгэхээр чансаатайхан барилдаан болгоё гэвэл шагнал өндөр гэж зарлах нь онох нь дээ.

Мань мэт нь бөхчүүдийг мөнгөөр даллаж барилдуулдаг цаг ирж дээ гэж ойлголоо. Барилдаан зохион байгуулагчид хойшид өөрийг бодоосой билээ. Бөхийн холбооныхон аливаад нэг сөрөг тайлбар хийдэг болохоор манай бөхчүүд мөнгөнд болоогүй гэх биз. Аягүйдвэл монгол бөх хөгжиж байгаа нь тэр гэж ч магадгүй л байх. Өндөр шагналд л унадаг бөхчүүдээ гэж. Улсын баяр наадмын бөхийг ч тоодоггүй болох нь уу даа.

Ц.Жамсран
Завхан аймгийн Их-Уул сумын иргэн