Ерөнхий сайд Л.Оюун-Эрдэнэ ХБНГУ-ын Канцлер Олаф Шольцын урилгаар тус улсад айлчлал хийхээр энэ сарын 12-нд Улаанбаатар-Франкфурт чиглэлийн ОМ137 аяллаар ниссэн. Ерөнхий сайдын айлчлалтай холбоотойгоор тухайн чиглэл нь Улаанбаатар-Берлин-Франкфурт болон өөрчлөгдсөн. Үүнд иргэд эсэргүүцлээ илэрхийлээд байсан юм. Нислэгийн чиглэл өөрчлөгдсөн асуудлаар Ерөнхий сайд Л.Оюун-Эрдэнэ: "Саяны нислэгээр 800 сая төгрөгийн зарцуулах байсныг 40 сая болгон хэмнэсэн. Даанч мэдээллээ өгөх дээрээ бид нар буруу, ташаа ойлголт төрүүлсэн. Гэхдээ хандлага нь зөв учир бухимдах зүйл биш. Учир нь чартер нислэгээр зорчдог байсан соёлыг халж, энгийн байдал руу шилжиж байна" гэжээ.
