нийтлэсэн Admin
Увс аймгийн Өмнөговь сумын нутагт янгир ямаа хамуурч орон нутгийн хэмжээнд арга хэмжээ авч байгаа ч үр дүнд хүрэхгүй байгаа талаарх мэдээлэл цацагдаж эхэллээ.
Тодруулбал, Өмнөговь сумын Улиастай, Баянгол багийн нутагт орших Төрийн тахилгат Алтан Ханхөхий, орон нутгийн тусгай хамгаалалттай Яргайт ууланд бэлчээрлэн амьдардаг янгир ямаанууд хамуурч одоогийн байдлаар зургаан настай тэх, гурван настай эм янгир хамуурсан байдалтай үхсэн байсныг нутгийн иргэд олжээ.
Энэ дагуу аймгийн Байгаль орчны хэлтэс тодорхой арга хэмжээ авсан ч үр дүн гарахгүй байгаа учраас асуудлыг Засгийн газрын хэмжээнд авч хэлэлцэх ёстой хэмээн нутгийн иргэд үзэж УИХ-ын гишүүн Ч.Хүрэлбаатарт албан бичиг явуулсан байна.
Харин Ч.Хүрэлбаатар гишүүн уг асуудлаар Засгийн газарт буюу БОНХАЖ-ын сайд Д.Оюунхоролд албан бичиг хүргүүлж, асуудлыг нэн даруй шийднэ хэмээн найдаж буйгаа давхар уламжилжээ.
