Өнгөрөгч 2016 оны сонгуулиар сэтгүүл зүйн армиас М.Оюунчимэг хэмээх эмэгтэй парламентад орж ирсэн. Алдаатай, оноотой дөрвөн жил ард хоцорч, М.Оюунчимэг гишүүний хувьд ч өдгөө ахин чингэлтэйчүүдээр дүнгээ тавиулахаар сонгуульд өрсөлдөж байна. Уг нь тэрээр нэгэн хуралдаан дээр боов идэж, “Боов” хоч зүүсэн болохоос бус бусдаар нэг их нуруу алдаагүй. Гэтэл Чингэлтэй дүүргийнхэн төдийгүй иргэд олон нийт нэгэн зүйлд ихээхэн гомдол тээдэг. Сүүлийн үед ард түмний зүрх сэтгэлд “зоосон” тэр үг улам бүр давлагаалж байгаа нь түүний үг олон нийтийн зүрх сэтгэлд, тэр тусмаа эмэгтэйчүүдийн сэтгэлд гүн шарх үлдээжээ гэдгийг мэдэж болно.
Учир нь тэрээр УИХ-ын гишүүн асан Д.Гантулга хүчингийн холбогдож, улмаар түүний асуудлыг УИХ-ын чуулган, Байнгын хорооны хуралдаанаар хэлэлцэх үеэр “Д.Гантулга гишүүн ямар нэг ажиллагаанд орсон байх вий, залуу хүний цаашдын хувь заяанд сөргөөр нөлөөлөх вий, хүчингийн хэрэг үйлдсэн баталгаа нотолгоог гаргаж өгөх хэрэгтэй. Нөгөө хүмүүс нь ямар билээ гэж бодохоор асуудал байгаа ш дээ” хэмээн байр сууриа илэрхийлсэн.
Энэ бол Хууль тогтоох дээд байгууллагын гишүүн хүнээс гарамгүй үг. Нэгэн ангид сууж байгаа гэмт хэрэгтнээ өмгөөлж, хохирогчдыг буруутгасан үг гэдэг нь илт харагдана. Хамгийн гол нь тэрээр “Цаад хүмүүс нь ямар билээ, баталгаа нотолгоо гаргаж өгөх хэрэгтэй” хэмээсэн нь шууд утгаараа бусдад хүчиндүүлж, доромжлуулсан бүсгүй, сэтгэл санаагаар хохирсон эгчийг нь тавласан мэт сонсогдоно. Төрийн эрх барих дээд байгууллагын гишүүн хүн ийм үг хэлээд зогсож байна гэдэг даанч боломгүй.
Тиймээс хохирогчийн эгч Ч.Саранзаяа “М.Оюунчимэг гишүүн та дүү бид хоёроос албан ёсоор уучлалт гуйх ёстой. Эх хүний хувьд ч эмэгтэй хүний хувьд ч Төрийн эрх барих дээд байгууллагын гишүүний хувьд ч жирийн иргэн дүү бид хоёрыг ямар хүмүүс билээ дээ бараг! Та нар мэдэж байгаа биз дээ гэсэн утга санаа бүхий үг хэлснийхээ төлөө уучлал гуйх ёстой” хэмээн цахимаар жиргэсэн нь бий. Түүнчлэн тэрээр “Төрийн ордноос УИХ дахь эмэгтэй гишүүн хүртэл хэвлэлээр дайрч доромжилсонд гомдолтой байна. Та олон нялх үрс хүчирхийллээс болон амиа алдаж, олон нийт бухимдаж байхад нэг үг унагаж, үг хэл лүү, та эх хүн, эмэгтэй үү мөн үү” хэмээн бухимдлаа илэрхийлсэн байдаг.
Энэ бол яах аргагүй иргэдээ төрд төлөөлж байгаа хүний амнаас гарах үг биш хэдий ч М.Оюунчимэг гишүүн яах аргагүй ийн хэлсэн нь хэвлэлийн архивт бий. Тэр тусмаа эмэгтэй гишүүн бусдыг хүчиндсэн гишүүнээ өмгөөлөн, хүчиндүүлж хохирсон бүсгүйчүүдийг баалж сууна гэдэг баймгүй асуудал. Гэтэл өдгөө М.Оюунчимэг гишүүн Чингэлтэй дүүрэгт нэрээ дэвшүүлчихсэн өрсөлдөж байна. Бодоход “Эмэгтэйчүүдийнхээ эрхийн төлөө, хүчирхийллийн эсрэг” энэ тэр гээд явж байгаа байх даа гэж бодохоор өөрийн эрхгүй бухимдал төрнө.
Эх сурвалж: Түмэн.мн
