Сүүлийн үед иргэд амар хялбар аргаар мөнгө олох гэсэн хүсэлдээ автагдан сүлжээний бизнест орж мөнгөө алдах тохиолдол ихээхэн гарах болсон байна. Сүлжээний бизнес гэдэг нь аль нэг улсын бараа бүтээгдэхүүнийг худалдан авах, мөнгө нийлүүлснээр хэсэг хугацааны дараа таны мөнгө 50-иас дээш хувиар өснө, ажлынхаа хажуугаар их мөнгө олох боломжтой зэргээр сурталчилгаа явуулж элсүүлж луйвар хийхийг хэлдэг байна. Аймгийн цагдаагийн газарт сүлжээний бизнест шинээр элсэн ороод доороо хүн нэмж элсүүлэх тоолондоо мөнгө авч сүлжээ үүсгэдэг хэлбэр болох “пирамид сүлжээ” байгуулах хэлбэрээр иргэдийн мөнгийг залилсан гэх хэрэг шалгагдаж байгаа юм.
Гаднын улсын дансанд мөнгөө өсгөнө хэмээн найдаж байрлуулсан ийм хэрэг манай аймагт 2 дахь удаагаа гарч байна
Одоогийн байдлаар Орхон аймгийн цагдаагийн газарт энэ төрлийн бизнест орж 700 мянгаас дээш төгрөгөө алдсан иргэдийн гомдол мэдээлэл гэмт хэрэгтэй тэмцэх тасагт шалгагдаж байна. Энэхүү сүлжээний бизнес нь Малайз улсаас гаралтай гэнэ. Сүлжээний бизнест орж мөнгөө алдах, аль нэг гаднын улсын дансанд мөнгөө өсгөнө хэмээн найдаж байрлуулсан ийм хэрэг манай аймагт 2 дахь удаагаа гарч байна. Иймээс иргэд олон нийт та бүхэн амар аргаар мөнгө олох талаар сурталчилсан зүйлд итгэж мөнгөө өгөхгүй байх, сүлжээний бизнест орох гэж байгаа бол тухайн бизнес хир тогтвортой үйл ажиллагаа явуулдаг, гарах эрсдэл зэргийг сайтар судлахыг анхааруулж байна.
Эх сурвалж: ERDENET INFO.MN
