2006 оноос хойш Малайз улсад гурван Монгол хүн амь үрэгдээд байгаа. Ш.Алтантуяа, Б.Энхтуяа нар бусдын гарт амиа алдсан. Тус улсын нөлөө бүхий улс төрчийн найз гэх Багиндатай холбоотой Ш.Алтантуяагийн хэрэг шударгаар шийдэгдээгүй. Хэргийн гол эзэн Багинда нь одоо огт гэмгүй хүн шиг наранд алхаж явна. Харин энэ хэрэгт Малайзын цагдаагийн хоёр ажилтан ял сонссон. Тэгвэл Б.Энхтуаяг хөнөөсөн этгээдийг олж илрүүлээгүй атлаа хэргийг хаачихсан байв. Саяхан, энэ оны 4 дүгээр сарын эхээр Малайзын Каула-Лумпур хотод, 29 давхар орон сууцны 6 давхараас унаж нас барсан Б.Отгонтуяагийн үхлийн шалтгаан, энэ хэргийн эзэн холбогдогчийг бас л олж тогтоолгүйгээр хэргийг хаажээ. Б.Отгонтуяатай хамт нэг байран амьдарч байсан гурван оюутан эмэгтэйгээс байцаалт авсан болоод л өнгөрсөн байна. Гадаад хэргийн яамны Консулын газарт ирүүлсэн бичигт “Б.Отгонтуяа өөрөө унаж нас барсан” гэсэн утгатай зүйл бичигдсэн байв. Талийгаач анх Малайз руу явлаа гэж ар гэрийнхэндээ хэлээгүй, харин Солонгост очно гэсэн байжээ. Ар гэрийнхэн нь ч түүнийг Солонгост байгаа гэж бодож байж. Гэтэл тэр Малайзанд амь үрэгдэж, энэ хэргийн төлөө хэн ч хариуцлага хүлээсэнгүй.
Б.Баяр
Эх сурвалж: Tumen.mn
