Шинээр томилогдсон Ерөнхий сайд Ч.Сайханбилэгийн эхний өдрийн ажлууд нэлээд шахуу, ачаалал ихтэй байлаа. Юун түрүүнд Засгийн газрын Хэрэг эрхлэх газрын тэргүүн дэд даргыг томилох, МАН-тай зөвшилцөлд хүрэх, 16 хоногийн турш хуралдаагүй Засгийн газрын хуралдааныг удирдаж, яаравчлан шийдвэрлэх асуудлуудыг хэлэлцэн шийдэх зэрэг олон ажил байв. Засгийн газрын Хэрэг эрхлэх газрын Тэргүүн дэд дарга н.Солонгыг ажилд нь эргүүлэн томиллоо. Харин МАН-ын удирдлагатай хэрхэн хамтрах талаар хандсан боловч өнгөрөгч өдрүүдэд хариу сонсож чадаагүй байна. Тус намын Удирдах зөвлөлийн хурлаар Ч.Сайханбилэгийг дэмжихгүй гэснээс үүдэн УИХ дахь намын бүлгийн гишүүд нь шинэ Ерөнхий сайдыг томилох чуулганы нэгдсэн хуралдаанд оролцоогүй. “Шударга ёс” эвслээс Г.Уянга гишүүн мөн ганцаараа Ч.Сайханбилэгийн дэмжээгүй. Энэ тухайд түүний харъяалдаг МҮАН-ын дарга Ж.Энхсайхан нь “Манай нам аль нэг гишүүнийнхээ хувийн санаа бодлыг хөнддөггүй, бидэнд хүний хувийн шийдлийг барьж түгжих зарчим байдаггүй. Шинээр байгуулагдах Засгийн газрыг аль болохоор дэмжих нь зөв” гэлээ. Хэрвээ Засгийн газрын танхимын онгорхой байгаа суудлуудаас МАН-ынхан авах сонирхолгүй, хамтрахыг хүсэхгүй бол УИХ-д суудалтай бусад нам, эвслийн оролцоотойгоор буюу хуучнаараа явахаас аргагүй болох аж. Өөрөөр хэлбэл, хуучин түншүүдтэйгээ хамтран танхимаа бүрдүүлж таарна. Одоо ажиллаж байгаа сайд нараасаа хэнийг нь үлдээж, хэнийг нь солих вэ гэдэг асуудал ч Ч.Сайханбилэгт тулгарч байна. Эдгээрийг Ерөнхийлөгчтэй зөвшилцөн УИХ-ын чуулганаар оруулж шийдвэрлүүлнэ. Магадгүй, шинэ сайд нарын дотор Ерөнхийлөгч Ц.Элбэгдоржийн “гарын” хүмүүс хэд хэдээрээ орж ирэхийг үгүйсгэж бас болохгүй. АН-ын дарга З.Энхболдын даргалж байсан “Шонхор” фракциас ч мөн сайдын суудалд залрах хүн бий гэж эх сурвалжууд хэлж байна.
Ерөнхий сайд Ч.Сайханбилэг юутай ч өнгөрсөн бямба гарагт Засгийн газрын хуралдаанаараа арбитрын хуулийн шинэчилсэн найруулга болон ял шийтгэл эдлүүлэх, нийгэмшүүлэх, шүүхийн шийдвэр гүйцэтгэх ажиллагааны хуулийн төслийн үзэл баримтлал, хүүхдийн спортын 5 дугаар их наадмыг өвөл, зуны төрлүүдээр зохион байгуулах, өвөлжилтийн бэлтгэл ажлын байдал зэргийг хэлэлцжээ.
Б.Баяр
tumen.mn
