Боловсролын салбар, ерөнхий боловсролын сургууль хоёр жил хатуу хөл хорионы дэглэмд байв. Хорионы үеийн сайдаар УИХ-ын гишүүн Л.Энх-Амгалан ажилласан. Түүний хувьд хичээлийн хуваарь гаргах ажилтай л цаг хугацааг өнгөрөөснөөс боловсролын салбарт хийж хэрэгжүүлсэн ажил гэж алга.

Гэтэл хамгийн их ажил хийсэн мэт харагдах нь цаанаа учиртай аж. Тэрбээр боловсролын салбарт ажил хийхээсээ илүүтэй “Сайд” хэмээх пиар технологийг хүчтэй нэвтрүүлсэн анхны сайдаар тодорч байна. Бараг урьд шөнө нь зүүдлээд хоносон зүйлээ ажил хэрэг болгон ярьж чаддаг ховорхон авьяастай сайд ажээ. Яамныхаа мэргэжлийн багийг бүрдүүлэхээсээ илүү пиар технологийн багийг хүчтэй бүрдүүлсэн гэдэг нь харагдана. Тус пиар багийнхан сайдынхаа бараг эвшээсэн бүгдийг ажил хэрэг болгон цацаж байгаа нь ийн хэлэхэд хүргэж байна. Ерөөсөө хийхээсээ ярьж хэлэх нь их сайд юм.

Үнэн хэрэгтээ Л.Энх-Амгалангийн яриад байгаа зүйлийг урьд өмнө ажиллаж байсан сайдууд хийсэн. Тэр дундаас Ц.Цогзолмаа, Ё.Баатарбилэг хоёр хийчихсэн юм. Түүний өмнө ажиллаж байсан хоёр сайдын хувьд энэ салбарт бодлогын болон бусад олон ажлыг амжуулж хийсэн төдийгүй хийхээр төлөвлөж байсан зүйлээ дуусгаж чадалгүй суудлаасаа буусан байдаг. Мань эр болохоор урьд өмнөх сайд нарынхаа хийсэн ажлыг, хийхээр төлөвлөсөн ажлыг зүүдтэйгээ хольж яриад сууж байгаагаас хийж хэрэгжүүлсэн зүйл алга.