"Нийгмийн сайн дурын зүтгэлтэн, цэнхэр үст" Цэрэн, Боловсрол, соёл, шинжлэх ухааны яамны газрын дарга Насанбаяр нарын хооронд Мүүний шашины тухай дайн дэгдэж, цахим ертөнцөд томоохон маргаан дэгдээж байсан цаг саяхан.
Улмаар "Цензургүй сурвалжлага" багийнхан "Мүүн"-ий гаж урсгалын тухай эрэн сурвалжлах нэвтрүүлэг бэлдэж, энэ асуудал нэг хэсэгтээ л шуугиан тарьж байсныг та бүхэн санаж байгаа биз ээ.
Хажуу талаас нь харахад Цэрэн, Насанбаяр гэдэг хоёр хүний хэрүүл мэт боловч агуулгаар нь хараад үзэхэд нийгэмд асар их хор холбогдол бүхий хараа хяналтгүй дэлгэрч, залуусыг боомилж байгаа гадны шашны гаж урсгалын үнэн мөнийг нээх, хүмүүст сэрэмжлүүлэг болох ач холбогдолтой хэлэлцүүлэг болж байна гэж олон нийт харж байгаа юм.
Энэхүү хэрүүл ч гэмээр, хэлэлцүүлэг ч гэмээр зарга маргаан үүссэнээс хойш холбогдох яам тамгын газар, байгууллагын анхааралд хүрч улмаар эхний шатны зохицуулалт, арга хэмжээг аваад эхэлсэн байдаг.
Учир юу гэвэл Хууль зүйн сайдын эрх асуудал, түүний чиг үүргийн хүрээнд төрөөс сүм хийдтэй харилцах асуудлыг хариуцан ажилладаг билээ. Үүний хүрээнд Монгол Улсад үйл ажиллагаа явуулж буй сүм хийд болон шашины байгууллагууд Монгол Улсын хууль тогтоомжинд нийцүүлэн үйл ажиллагаа явуулж буй эсэх талаар үнэлгээ хийх зорилгоор ажлын хэсэг байгуулсан юм.
Тэгвэл өнгөрсөн амралтын өдрүүдэд мүүнийхнийг баривчилсан талаарх мэдээллийг сэтгүүлч Л.Мөнхбаясгалан цахим хуудсаараа дамжуулж олон нийтэд мэдээллээд байсан Тодруулбал, Япон улсын иргэн Мацумото болон БНСУ-ын иргэн Кан нарыг баривчлан саатуулсан гэсэн юм.
Энэ мэдээллийн цагдаагийн байгууллагаас тодруулахад "Хэвлэлээр гараад буй эл мэдээлэл худал. Ямар учраас ийм мэдээлэл тархаад байгааг ойлгохгүй байна. Мүүний шашинтай холбоотой хоёр иргэнийг саатуулсан гэж худлаа" гэв.
Д.Дуулим
