Социализмын үед Октябрын баяр, Майн нэгэн, Ардын хувьсгалын ойн баярт ямар ч их ач холбогдол өгдөг байсан юм бэ дээ. Улс төрийн талаас нь шүү дээ. 
Энэ баяруудаар Сүхбаатарын талбайд жагсаал болно. Албан байгууллага, сургуулиуд бүх хүнээ оролцуулах ёстой. Албан байгууллага сургуулиудын  нам, эвлэлийн  байгууллага ирц бүртгэнэ. Аль аль хэсэг нь хаана явах, хэн хэн ямар туг далбаа барих гээд бүгдийг хуваарилж, хүн хүнд хариуцуулна. Баярын жагсаал тасалсан хүн бол улс төрийн талаар но-той болж хувирна. 
Байгууллага бүр их Маркс, Энгельс, Ленин, Чойбалсан, Цэдэнбал гээд жолоодогч нарын зургийг заавал барих ёстой, улаан цэнхэр туг, лоозон барина. Ямар үг үсэгтэй лоозон байхав гэдгийг Хотын намын хороо гаргаж, байгууллагуудад хуваарилна. Одоо буулгачихаад байгаа Хэвлэлийн комбинатын барилгын дээр МАХН-ын Төв хорооны Улс төрийн товчооны гишүүдийн / 11 хүн байсан санагдана / зургийг зурж тавина. Нэгжийн дарга нар хэн хэн ямар даргын зураг, ямар өнгийн туг далбаа барьж хаана явахыг оноож өгнө. Ухаандаа Сүхбаатарын бунхан дээр зогсч байгаа дарга нарын талд өнгөтэй өөдтэй хувцас бүхий хүнийг явуулах ёстой. МАХН-ын Төв хороо, Сайд нарын зөвлөлийн дарга нар бунхант индэр дээр зогсч, жагсаалаар яваа хүмүүс рүү гар даллан мэндчилж “хийморийг нь сэргээнэ” 
Байгууллагууд машин тэргийн гоёмсгоор чимж жагсаалынхаа эхэнд явуулна. Хүмүүсийн зарим нь цэцэг барина. Тэр  үед ямар амьд цэцэг олддог байсан биш,  цаасан цэцэг  л барина шүү дээ. 
Монголын радио, телевизийн гайгүй нэвтрүүлэгч нар МАХН-ын Төв хорооноос баярт зориулан гаргасан баярын уриаг чанга чангаар уншина. Жагсаалд оролцогсод дагаж “УРА” цуурайтуулан хашгирах ёстой. Ухаандаа “Монголын төр нийгмийг удиран жолоодогч, марксизм-Ленинизмийг үйл ажиллагаандаа удирдлага болгосон Монгол Ардын хувьсгалт нам мандтугай. Ура” гэхэд талбайгаар жагсч яваа хүмүүс ура хашгираад л.......
Октябрийн баяр бол өвөл ирж байгаагийн илэрхийлэл болдог байсан бол Майн баяр нь хавар, урин цаг ирж байгаагийн дохио. 

Албан байгууллага, сургуулиуд жагсаал тараад л энд тэндгүй зургаа татуулцгаана, тэгээд л бөөн бөөнөөрөө зугаална. Явдаг  газар нь Хүүхдийн парк, богд уул даа. За тэгээд ажил алба хийдэг хүмүүс бол гуанз зоогийн газарт ордог бол хөөрхий оюутнууд ангиараа кино үзнэ дээ. 
Угаасаа чамин тансаг юм ховор байсан ч  баяраар бас гайгүй чихэр жимс худалдана. Бодоход нөөцөлж байгаа л баяраар гаргадаг байсан байх. 
Баярын тэр өдөр нийслэл хот нэг л сайхан өнгөлөг, тэнгэр ч сайхан байдагсан. Хүмүүс гоё сайхан хувцасаа өмсчихсөн, хүн бүрийн царайд инээмсэглэл тодроод л....Хүүхдүүдийн сэтгэл хөөрчихсөн, бөмбөлөг, туг далбаа.....
Одоо бодоход энэ их сүр дуулианаар ямар ч их улаан цэнхэр даавуу сүйтгэж байсан юм бол доо. Харин зураг урлал, дүрслэх урлагийн байгууллагууд овоо орлоготой ажилладаг байсан байх. Байгууллаг бүр уриа лоозонгоо бичүүлнэ, өнөөх дарга нарын зургийг зуруулна. Дарга нарын хөрөг зургийг бас хэн хамаагүй гарын дүйтэй хүн зурж болохгүй, улс төрийн хувьд буруутна. 
Гэхдээ л социализмын үед үзэж өнгөрүүлсэн тэр олон баяр нэг л сайхан дурсамж үлдээсэн байдаг юм. Жил бүр л яг адилхан юм шиг урсаад л өнгөрсөн ч гэлээ баяр болгон өөр өөрийн онцлог, өөр өөрийн дурсамжтай.
Биднийг дээд сургуульд орсон жил, хонхны баярын өмнөх майн баяр, тэр охин маань төрдөг жил........гээд л.....