Хөгжлийн банкны шалгалтын талаар Засгийн газрын хэрэг эрхлэх газрын дарга Л.Оюун-Эрдэнэ мэдээлэл хийлээ.

Мэдээллийнхээ эхэнд, "Өнөөдөр Монгол Улс Хөгжлийн банкийг цаашдаа яаж олон улсын чиг үүргээр нь ажиллуулах уу, яаж хохиролгүй байх вэ гэдэг дээр онцгой анхаарал хандуулж ажиллах цаг хугацааны өмнө ирсэн байна" гэдгийг онцлон хэлсэн юм. 

Харин шалгалтын дүнгийн тухайд, Хөгжлийн банк хангалттгүй үнэлгээ авсан гэдгийг тодотголоо. Тодруулбал шалгалтаар, Арилжааны банкнаас санхүүжүүлэх боломжтой 13 жижиг төсөлд нийт 34.3 тэрбум төгрөгийн зээлийг олгосон, Зээлийн бүтцийг өөрчилж, гэрээний хугацааг олон удаа сунгадаг. Зарим зээлд 8 удаа бүтцийн өөрчлөлт хийж хугацааг сунгасан. Гүйцэтгэх захирал мөнгөн хадгаламж байршуулах, буцаан татах гэх мэт их хэмжээний эрх мэдэл өөрөө өөртөө төвлөрүүлсөн, Худалдаа хөгжлийн банкан дахь Хөгжлийн банкны одоогийн байрыг хэт өндөр үнээр худалдан авсан, Эдийн засгийн хөгжлийн сайд Н.Батбаяр, Аж үйлдвэрийн сайд Д.Эрдэнэбат, Төлөөлөн удирдах зөвлөлийн дарга Б.Шинэбаатар, Гүйцэтгэх захирал Н.Мөнхбат, Хөгжлийн банкны холбогдох ажилтан, албан тушаалтнууд зээлдэгчид давуу байдал олгосон байж болзошгүй, 2015-2016 онд ажиллаж байсан Хөгжлийн банкны удирдлагуудын хариуцлагагүйгээс болж банк их хэмжээний алдагдлыг хүлээсэн гэх мэт томоохон зөрчлүүд илэрсэн байна.

Мөн тэрбээр, "Чингис, Самурай, Евро бонд болон бусад эх үүсвэрээс 2012 - 2016 онд Хөгжлийн банкаар дамжуулан нэр бүхий аж ахуй нэгжүүдэд зээл олгосон үйл ажиллагаатай холбогдох асуудлыг өнөөдөр хууль хяналтын байгууллагад шилжүүлсэн. Цаашдаа Монгол Улсын банкны эрхзүйн орчныг бий болгох зайлшгүй шаардлага байна. Мөн Хөгжлийн банк арилжааны банктай төслөөр өрсөлдөхгүй байх ёстой. Зөвхөн том төслүүд буюу дэд бүтцийн төслүүд рүү хөрөнгө оруулалт хийх хэрэгтэй. Түүнчлэн 20 тэрбумаас доош зээлийг Хөгжлийн банк гаргахгүй байх ёстой гэдгийг журмаар юм уу, хуулиар хориглох хэрэгтэй" гэв.

Харин удирдлагуудын тухайд, "ТУЗ-ийн бүрэлдэхүүнд өөрчлөлт оруулах ёстой гэж үзсэн. Гүйцэтгэх удирдлага өөрөө өргөдлөө өгч, өөрчилсөн. Боловсон хүчний чадавх муу байна гэж үзсэн учир Г.Амартүвшин захиралд шилжилтийн үед ажиллаж өгөөч гэж хүсэлт тавьсан. Шилжилтийн үеийг бид ирэх оны нэгдүгээр сарын 1-н хүртэл гэж тооцож байгаа" гэсэн юм.