Халдвар Монголд хаа сайгүй л байна. Төр засаг нь ч тоож байгаа юм алга, наадам, өршөөл ярьсан шиг сууна. Хоёр хоногийн өмнө 25 сая хүн амтай Австрали улсад хоногт коронавиурсийн халдварын 128 тохиолдол бүртгэгдэхэд Засгийн газар нь түргэн авч яаралтай хуралдаан зарлаж байх жишээтэй. Харин 3 сая гаруйхан хүн амтай Монгол улсад хоногт 2200 давсан халдвар бүртгэгдэж, 15 иргэн нь нас барж байхад төр засаг нь мэдээгүй юм шиг царайлж, гөлийж гөлтийгөөд сууж байх жишээний.
Бухимдал дээр бухимдал нэмсэн, ийм буруу ишилсэн сүх шиг Засгийн газартай олон нийтийн зүгээс наадмаа цуцла хэмээн заргалдаж, ХЭҮК хурдан морины уралдааныг хойшлуулах санал болгоод ч тоож байгаа юм алга.
Эрүүл мэндийн сайд С.Энхболд “Наадмыг зохион байгуулагчид болон оролцож байгаа уран бүтээлчид, бөхчүүд, сур харваачдаас бүгдээс нь коронавирус илрүүлэх шинжилгээ авч байгаа. Халдвар хамгааллын дэглэмийг чанд мөрдүүлж,ТОГТМОЛ ШИНЖИЛГЭЭ авч байгаа тул эрсдэл бага гэж үзэж байна" гэжээ.
Халдвар авсан, хавьтал болсон иргэд шинжилгээ гэж ширүүхэн сорилттой тулгараад байна. ПСР байтугай түргэвчилсэн шиинжилгээний тест ч олдохоо больсон. Шинжилгээ авч буй өрхийн эмч өөрийгөө өвдсөн эсэхийг ч сорьц илүүчилж үзэх боломжгүй хүндрэлтэй нөхцөл байдалд ажиллаж байгаа тухай өчигдөр зарим хэвлэл мэдээллийн хэрэгсэлд нийтлэгджээ. Тиймээс эрсдэлтэй иргэдтэй тулж ажиллаж, хавьтлуудаас шинжилгээ авч буй бүх шатны эмнэлгүүдэд шинжилгээний сорьцын багцаа бүр тоолж, ширхэглэж хуваарилж буй аж. Оргүйгээс охинтой гэдэг шиг амсуулах аргацаах төдий тест хуваарилж байгаа гэсэн үг.
Цонхны цаадах амьдрал бодит байдал дээрээ ийм байхад УОК, Засгийн газар сургаар ажиллаж, багцаагаар баримжаалж цахим наадам хэмээн цамнаж байна.
Байгаа жаахан шинжилгээний сорьцоо халдвартай, хавьталтай иргэдэд зориулахын оронд цахим наадмын оролцогчдод гар татахгүй зарцуулж байгаа гэдгийг салбарын сайд нь өөрөө хэлчихлээ.
Эрүүл мэндийн сайд С.Энхболд “Наадмыг зохион байгуулагчид болон оролцож байгаа уран бүтээлчид, бөхчүүд, сур харваачдаас бүгдээс нь коронавирус илрүүлэх шинжилгээ авч байгаа. Халдвар хамгааллын дэглэмийг чанд мөрдүүлж, ТОГТМОЛ ШИНЖИЛГЭЭ авч байгаа тул эрсдэл бага гэж үзэж байна" гэжээ. Тогтмол гэж хэлж байгааг бодоход ахин дахин шинжилгээ аваад байгаа бололтой юм. Цахим гэж нэрлээд байгаа ч Хүй 7 худагт 1024 бөх, засуулууд, унаач хүүхдүүд, уяачид, урлаг соёлынхон, үйлчилгээнийхэн гээд тооцохоор тэнд наанадаж л 10 гаруй мянган хүний бөөгнөрөл үүснэ. Энэ олон хүний шинжилгээнд тэр сорьцоо гарлагдаад байгаа юм биш үү.
Хэрэв наадам гэж байгаад халдвар тараавал Улаанбаатарт эмчлэх эмч, хэвтэх эмнэлэг байхгүй гэдгийг анхааруулсаар байхад Засгийн газар нүдэн балай, чих нь дүлий байна.
Гэтэл үүний нөгөө талд халдварын эрсдэлтэй иргэд байтугай эрүүл мэндийн салбарынхан чинь шинжилгээний сорьцоор дутагдаж гачигдаж байна. Хувийн эмнэлгүүдэд очоод 90 мянган төгрөг төлөөд шинжилгээ өгөх чадвартай иргэд эдийн засгаа сөхрүүлчихсэн ийм үед хэд билээ.
ЭМ-ийн салбарын 50 гаруй мянган ажиллагчдаас 3000 гаруй нь халдварт өртчихсөн, сорьцны нөөц дуусч байгаа учир өөрсөддөө шинжилгээ хийх эрхгүй болчихоод байгааг дээр өгүүлсэн. Харин хавьтал болсон жирийн иргэдийн хувьд дээшээ тэнгэр хол, доошоо газар хатуу гэдэг шиг л байна.
Халдвар авсан иргэдийн ойрын хавьтлуудаас зургаа хоногийн дараа PCR шинжилгээ авна гэсэн журмаар ажиллаж байгаа гэх боловч яг бодит байдалд энэ нь биелэхгүй байна.
Ойрын хавьтал болсон зарим иргэдээс шинжилгээ авах нь бүү хэл гэртээ нэгдүгээр хавьталтайгаа хамт эмээ уугаад 10 хоноод эдгэнэ, бид ачааллаа үнэхээр дийлэхгүй байна гэж өрхийн эмч нар нь учирлаж байгаа аж.
Гэтэл ЭМ-ийн сайд С.Энхболд өдөр бүр 10000 pcr шинжилгээнд 500 сая буюу хагас тэрбум төгрөг зарцуулж байгаа талаар өчигдөр мэдээлжээ. Хэрэв үнэхээр ийм бол тэр 10 мянган ПСР хаагуур хэнд хүрээд байна вэ. Цахим наадамчдад уу, эрхтэн дархтануудад уу...
Ухаангүй төрийн урагшгүй бодлого нэг иймэрхүү.
Г.Хан
Toim.mn
