Энэ онд хөрш орнуудын төрийн тэргүүн нар манай улсад айлчлан ирж “Талын зам” төслийн талаар эхний яриа хэлцэл хийгээд явсан юм. Ази-Европыг холбосон, Сибирийн их баялагийг Хятад болоод Ази руу тээвэрлэх хамгийн дөт зам бол Монгол гэдгийг дахин тодотгоод явсан.
Хэдэн жилийн өмнөөс “Чингис Лэнд Девелопмент” групп гэх үндэсний том групп Алтанбулаг-Улаанбаатар-Замын үүд чиглэлд 1000 км хурдны авто зам барих тухай хэвлэл мэдээллээр тавигдаж, Засгийн газартай концессийн гэрээ байгуулсан, удахгүй замын нээлт эхэлнэ гэх мэдээ чих дэлсэж байсныг сонирхон холбогдох төрийн байгууллагуудаас тодруулсан юм. Тус группын хурдны замын төслын бүтээн байгуулалт 2015 оны хавраас эхлэхээр төлөвлөж байгаа. “Энэ нь Монголд урьд хожид хийгдэж байгаагүй том бүтээн байгуулалт болно. Энэ замыг дагаад 4-5 дагуул хот бий болж, тэнд аялал жуулчлалын том төвүүд, зочид буудлууд, худалдаа, логистик, тээврийн томоохон төвүүд баригдаж, олон мянган хүн ажлын байр төдийгүй амьдрах сайхан байртай болно” гэж албаны хүн ярилаа.
Манай улсын хувьд хурдны зам барих туршлага байхгүй, мөн хурдны замын стандарт үгүй тул төрийн холбогдох байгууллагад үүнд анхаарал хандуулж байгаа юм байна. Хурдны замын бүтээн байгуулалтын ажилд гүйцэтгэгч компанийг сонгохдоо олон улсын нээлттэй тендэр зарлах бөгөөд одоогоор ерөнхий гүйцэтгэгчээр ажиллах сонирхлоо олон улсын 20 гаруй том корпорациуд илэрхийлээд байгаа гэнэ. Гуравхан жилийн дотор барьж ашиглалтад оруулахын тулд 500 саяас 1 тэрбум ам.долларын тендерийн баталгаа гаргах чадавхитай компаниудыг гүйцэтгэгчээр сонгох гэх мэт өндөр шаардлагыг тавих аж. Энэхүү хурдны зам нь 2 урсгалтай, 6 эгнээтэй зам байх бөгөөд олон улсын авто замын С1 зэрэглэлийн стандартаар барих юм байна.
Алтанбулаг-Улаанбаатар-Замын үүд чиглэлийн хурдны зам нь “Талын зам”-ын 5 төслийн зөвхөн нэг нь бөгөөд хоёр хөрш орны худалдаа эдийн засагт түлхэц өгөх бусад төслүүд рүү нь ч цаг алдалгүй орж, төр хувийн хэвшлийн хамтын ажиллагааг өрнүүлэх гэж байна.
Эх сурхвалж: Dorgio.mn
