Төрийн албан хаагчдын тоог цомхотгох шийдвэр гарсан ч хараахан хэрэгжиж эхлээгүй байгаа. Цомхотголд 885 албан хаагч өртөх тоцоо бий. Тэдний дундаж цалин 800 мянган төгрөг гэж үзвэл жилд 4.2 тэрбум төгрөг хэмнэнэ гэсэн үг.  Энэ бол бага мөгө биш. Зөвхөн нийслэлд гэхэд Э.Бат-Үүл дарга 2 орлогчтой,орон тооны зөвлөхгүй, Дүүргүүдийн Засаг дарга нар1 орлогчтой үлдэхээр  шийдсэн. Нийслэлийн удирдлагууд шинэ оны босгон дээр Засгийн газрын энэхүү шийдвэрийг хэрэгжүүлэх бэлтгэлээ хангаж байгаа гэнэ. Цомхотголд орох албан тушаалтнууддаа өөр ажлын байр санал болгох, нийслэлийн орлогчоор ажиллаж байсан хүмүүст тодорхой төслийн ажлыг удирдаж өөрийгөө санхүүжүүлэх боломжийн талаар ч ярилцаж байгаа ажээ.

Төрийн албан хаагчдын тоог цөөрүүлэхгүйгээр цааш энэ хэвээрээ явж болох тухай харин Төрийн албан хаагчдын холбоо зэрэг иргэний байгууллагууд мэдэгдэж байна. Төрийн албан хаагчдын цалингаас  өөр төрлийн хэмнэх зүйл их байгааг тэд онцолж байна. Тухайлбал, бичиг хэргийн зардал энэ онд өмнөх оныхоос 4 тэрбум төгрөгөөр, түлш шатахуун 9 тэрбум төгрөгөөр  өссөн дүн гарчээ. Мөн 220 гаруй автомашин шинээр худалдан авсан зэрэг үр ашиггүй зардал их байсныг хумих бодлого баримтлан хэрэгжүүлж болох байсан гэж байна. Түүнчлэн жил бүр төрийн албанд сул орон тоо нэлээд их гарч байжээ. Иймэрхүү бүх нөхцөлийг  тооцоолж,  одоогийн ажиллаж байгаа төрийн албан хаагчдаас нэгийг нь ч хасахгүйгээр хоёр жилийн дараа төрийн албан хаагчдын тоог 2012 оны түвшинд аваачих боломжтой гэнэ. Гэвч нэгэнт шийдвэр гарчихсан тул иргэний байгууллагууд яаж ч яриад нэмэргүй биз. Ерөөсөө Н.Алтанхуягийн Засгийн газрын нэг алдаа нь төрийн албан хаагчдын тоог хэт олшруулж, данхайсан бүтэцтэй болгосон явдал байлаа. Тэгвэл төрийн бус байгууллагын нэрээр энэ алдааг өмөөрөх нь хэнд ашигтай вэ. Энэ яавч сайн зүйл биш болов уу. Эдийн засгийн хямралаас гарахын тулд цомхон бүтцээр ажиллахаас өөр замгүй.

Б.Баяр

Эх сурвалж:Tumen,mn