Эрдэнийн чулууны шинжээч Ш.Бямбасүрэнтэй хийсэн сонинхолтой ярилцлагын цувралаас толилуулж байна.

-Манай гоёл чимэглэлийн үйлдвэрүүдийн хөгжлийн өнөөгийн түвшин ямархуу байна?

-Сүүлийн жилүүдэд тогтвортой үйлдвэрлэл үйлчилгээ эрхэлж, манай байгууллагаар байнга үйлчлүүлдэг 130 шахам аж ахуйн нэгж, иргэд байна. Тэдний үйлдвэрлэл янз бүр байгаа ч ер нь их сайжирсан нь ойлгомжтой. Солонгос Турк, БНХАУ-аас тоног төхөөрөмжөө оруулж ирсэн, дамжлага нь механикжсан үйлдвэр олон болсон. 

Уламжлалт аргаар хийж байгаа нь ч бий. Ер нь дотоодын үйлдвэрлэгчид маань үндсэндээ сорьцын хяналтанд хамрагдаж хэвшсэн гэж хэлж болно. Орон нутагт байгаа үйлдвэрлэлийг сорьцын хяналтад хамруулахад хүндрэлтэй байна.

Сорьцын хяналтанд хамрагдахгүй байгаа нь зөвхөн импортоор оруулж ирсэн, өөрөөр хэлбэл гадаад орны үнэт эдлэлүүд юм. Манай байгууллага хэрэглэгчдийн болон дотоодын үйлдвэрлэгчдийнхээ эрх ашгийг найдвартай хамгаапах үүднээс л импортын буюу гадаадаас орж ирж байгаа үнэт эдлэлийг сорьцын хяналтанд хамруулах талаар түлхүү анхаарч байна.

-Мөнгөн аяганы дотор нь цаас шиг нимгэн болохоор таталдаад амархан урагддаг, үрчийдэг болчихлоо. Танайх уг нь сорьцын баталгаа дардаг биз дээ?

- Тийм яриа гардаг төдийгүй, амьдрал дээр маш их тохиолддог зүйл. Сүүлийн жилүүдэд нэг талаас үнэт металлын үнэ асар их өссөн, нөгөө талаас манайд одоохондоо мөнгө олборлодог уурхай байхгүйн улмаас мөнгийг гадаадаас импортоор оруулж ирж байгаа учир мөнгөн эдлэлийн үнийг хямдруулахын тулд орцыг нь багасгахаас өөр аргагүй болдог. 

Орц багасгана гэдэг нь сорьцын хэмжээг бууруулна, металлынхаа орцын хэмжээг багасгана гэсэн үг. Тэгэхээр бага металлыг маш нимгэлж эдлэл хийх шаардлага гарч байгаагаас шалтгаалж ийм зөрчил үүсч байгаа. Үүнийг таслан зогсоох боломжгүй. 

Мөнгөний ион нь өвчин үүсгэгч бактери, вирусыг устгаж ариутгадаг. Монголчууд үүнийг эртнээс мэддэг байсан учраас учраас хоол хүнсний замаар нян халдварлах аюулыг арилгах зорилгоор мөнгөн аяга хэрэглэдэг байсан. 

Тэгэхээр мөнгөний нимгэн зузаандаа биш, гагцхүү түүний ион хүний биенд хэрэгцээтэй учир тухайн хэрэглэгч өөрийн санхүүгийн боломж, хэрэглээндээ тохируулж эдлэлээ сонгож авах ёстой. Өнөөдөр мөнгөн хучилттайгаас эхлээд маш их орцтой хэдэн саяын үнэтэй аяга зөндөө хийгдэж байгаа шүү дээ.

Эх сурвалж: Bolod.mn