Хууль тогтоох дээд байгууллагын 76 гишүүн тангараг өргөдөг гэдгийг эхэнд сануулъя.

Сануулахын учир нь бодит нөхцөл байдлыг харахад, ард түмний сонголтоор төрийн эрх мэдлийг хэрэгжүүлэх үүрэг хүлээсэн гишүүд эзний дүрд тоглодог жишиг манайд тогтчихжээ. Энэ завхарсан жишгийн нэгэн тод томруун жишээ нь УИХ-ын гишүүн Г.Амартүвшингийн үг, үйлдэл болоод байна.

Уг нь тэрбээр УИХ-ын гишүүний тангараг өргөхдөө "Монгол Улсын Их Хурлын гишүүн би ард түмнийхээ элчийн хувьд нийт иргэн, улсын ашиг сонирхлыг эрхэмлэн, төрт ёс, түүх соёлынхоо уламжлалыг хүндэтгэж, Монгол Улсын Үндсэн хуулийг дээдлэн сахиж, авлига, ашиг сонирхлын зөрчлөөс ангид байж, гишүүний үүргээ чин шударгаар биелүүлэхээ тангараглая. Миний бие энэ тангаргаасаа няцвал хуулийн хариуцлага хүлээнэ” хэмээн уншсан нэгэн.

Гэвч тэрбээр өдгөө эл тангарагтаа харшилсан асуудалд орооцолдсоноос гадна Монгол Улсын хууль шүүхийн байгууллагыг ч үл тоосон зүйлсийг хэвлэлээр хэлж яриад зогсож байх юм.

Хөгжлийн банкны захирлын албыг хашиж байхдаа албан тушаалаа ашиглан бусдад давуу эрх олгосон байж болзошгүй гэх үндэслэлээр АТГ-т шалгагдаж, улмаар яллагдагчаар татагдаад буй түүнийг гишүүний бүрэн эрхийг түдгэлзүүлэн шалгах хүсэлтийг Ерөнхий прокуророос өнгөрсөн 4 дүгээр сард парламентад хүргүүлсэн. Харин ангийнх нь нөхөд түүний УИХ-ын гишүүнийх нь бүрэн эрхийг нь түдгэлзүүлэх шаардлагагүй гэж үзэж байв. Гэвч хууль хяналтынхны зүгээс түүнийг шалгах үндэслэлүүд байгаа гэдгээ илэрхийлж, шүүхээс Г.Амартүвшинд хилийн хориг тавих шийдвэрийг гаргав.

Тодруулбал, Нийслэлийн Прокурорын газрын хяналтын прокуророос яллагдагч Г.Амартүвшинд Эрүүгийн хуулийн ерөнхий ангийн 1.8 дугаар зүйлийн 3, 1.9 дүгээр зүйлийн 1, 3.7 дугаар зүйлийн 1 дэх хэсгийг тус тус журамлан, мөн хуулийн тусгай ангийн 22.1 дүгээр зүйлийн 2 дахь хэсэгт заасан гэмт хэрэгт яллагдагчаар татаж, Эрүүгийн хэрэг хянан шийдвэрлэх тухай хуулийн 14.9 дүгээр зүйлийн 1 дэх хэсгийн 1.3 дахь хэсэгт заасан үндэслэлээр Монгол Улсын хилээр гарахыг хязгаарлах хязгаарлалт тогтоох таслан сэргийлэх арга хэмжээ авах тухай санал ирүүлснийг хүлээн авч, хянан хэлэлцэв. Эрүүгийн хэрэг хянан шийдвэрлэх тухай хуулийн 14.5 дугаар зүйлийн 1 дэх хэсэгт заасны дагуу яллагдагч Г.Амартүвшинд 2022 оны 5 дугаар сарын 30-ны өдрөөс Монгол Улсын хилээр гарахыг хязгаарлах хязгаарлалт тогтоох таслан сэргийлэх арга хэмжээг авч шийдвэрлэлээ.

Сануулахад, шүүхээс ийнхүү хилийн хориг тавихаас өмнөх өдрүүдэд түүнийг Швейцарь улс руу явсан учраас түүнд холбогдох хэргийн шүүх хурал хойшиллоо гэх мэдээлэл гарсан.

Харин тэрбээр өчигдөр энэ тухай нь тодруулж асуусан сэтгүүлчийн асуултад хариулахдаа: " Би байж л байгаа биз дээ. Зугтсан барьсан гээд юу солиороод байгаа юм" хэмээн хэтэрхий бүдүүлэг, дээрэнгүй хариулт өгөв. Мөн өөрт нь хилийн хориг тавих шүүх хуралд оролцох уу? хэмээн асуухад, "Юу гэж оролцдог юм" хэмээн Монголын шүүх байгууллагыг үл тоомсорлосон хариултыг хээвнэг өгсөн юм.

Эхэнд хэлсэнчлэн, Монголын ард түмний өмнө тангараг өргөсөн гишүүн хүн үүргээ ухамсарлан, элдэв бусармаг асуудлаас ангид байх ёстой атал Г.Амартүвшин гэж энэ гишүүнд тийм хэмжээний ёс зүй үнэндээ алга. Ийм асуудалд холбогдсондоо иргэд, сонгогчдоосоо уучлал гуйж, хүлцэл өчих ёстой байтал эсрэгээрээ хэвлэл мэдээллийнхнийг загнаж, зандраад байж байгаа нь тун харамсалтай.

Tumen.mn